कहाँ अन्हरिया के राह निकलल
सुरूज त अपने सियाह निकलल
बहुत सँइत के हिया में रखलीं
तबो दरद लुरछुताह निकलल
जवन किरिन से बिहान होइत
उहे किरिन जरतुआह निकलल
लिहाज, इज्जत, सनेह, सनमत
ई, दौर में सब तबाह निकलल
नदी जे तड़पत रहे पियासे
'रिपोट' में ऊ अथाह निकलल।
नया जमाना के आदमी हऽ
चिहाईं जनि, जो बिखाह निकलल
भइल शराफत के घर तलाशी
कदम-कदम पर गुनाह निकलल
गजल ऊ कइसन कि सुनिके 'मिथिलेश'
ना आह निकलल, ना वाह निकलल
स्रोत :
- पुस्तक : केकरा से माँगीं अँजोर (पृष्ठ 44)
- रचनाकार : मिथिलेश ‘गहमरी’
- प्रकाशन : सत्यांश उपक्रम (प्रा.) लिमिटेड, बलिया
- संस्करण : 2019
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
