केहू मनके नगरिया
kehu manke nagariya
लूटि ले गइल केहू मन के नगरिया।
दिल के दिवाना बनाके सँवरिया॥
लूटि ले गइल...
अँखिया की पुतलिन से दिल में समाके।
अपनी पिरितिया के जादू चलाके॥
तनिको भइल ना, दिल के खबरिया॥
लूटि ले गइल...
सुधि बुधि हेराइल सजनवां की प्यार में।
बीति गइल रतिया करत इन्तजार में।
सजना बसल कवनी, जाके शहरिया॥
लूटि ले गइल...
मन की बगिया के फुलवा फुलाइल।
आवारा भौंरा बा मन बउराइल॥
निकलीं डर से ना, दिन दुपहरिया॥
लूटि ले गइल...
बहुते 'अधीर' बा सजन बिनु मनवां।
कब होई पूरा अब मन के सपनवां॥
हँसी उड़ावेला सगरी नगरिया॥
लूटि ले गइल...
स्रोत :
- पुस्तक : गँउवा के माटी अनमोल (पृष्ठ 54)
- रचनाकार : रामबहादुर ‘अधीर पिण्डवी’
- प्रकाशन : अखिल भारतीय भोजपुरी समाज, गोमतीनगर, लखनऊ
- संस्करण : 2010
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
