ना अइलऽ बरिसात में
na ailऽ barisat mein
कतना दिन से आस लगवलीं, ना अइलऽ बरिसात में!
झूठे पाती भेजत रहलऽ, खूब भोरवलऽ बात में!
फगुओ बीतल चइतो बीतल
बीत गइल सावन-भादो,
अतना सह के कौन करी, विसवास मरद के जात में!
गइयाँ के कइसन हऽ लोगवा
से तूहूँ जानत बाड़ऽ,
हमरा पीछे कतने नवहीं, लागल बाड़े घात में!
पंडी जी से सगुन करवलीं
कहले छठ में आ जइहें,
काल्हे दिन में खूबे सरकल, सोचत रहलीं खात में!
जाड़ा के मौसम आवत बा
हउँकत बाटे पुरवाई,
का का हमरा ऊपर गुजरी, पूस-माघ के रात में!
सभका खातिर सभ आवत बा
हम जोहत बानी बटिया,
हमरा खातिर हे निर्मोही, विरह मिलल सौगात में!
स्रोत :
- पुस्तक : अलग-अलग रंग (पृष्ठ 72)
- रचनाकार : सूर्यदेव पाठक ‘पराग’
- प्रकाशन : प्रभात कुमार पाठक
- संस्करण : 2009
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
