सुनि के रोअइया मजूरवन के पूतवन के

विजेन्द्र अनिल

Roman

सुनि के रोअइया मजूरवन के पूतवन के, फाटे ला करेजवा हमार,

भोरहीं मचेला कोहराम रोज घरवा में, लड़ेलन स रोजे चारि बार।

गुरवा-मिठइया त सपने में लउकेला, मिलेला न उहनीं के भात,

सतुआ के लिबरी फजिरहीं खा चाटेलन स, ओही प कटेला दिन रात।

रोजे-रोजे सतुओ भेंटाला नाहीं भोरवा में, कटि जाला कबहूँ उपास,

दिन भर आसरा में ताकेलन स टुकुर-टुकुर मिटि जाला रतिया में आस।

देहिया में बाटे एगो फटही भगइया हो, एगो बड़ुए फटही कमीज,

ओहू में से निकलेला मंहक पसेनवा के, भरल बड़ुए ओहु में गलीज।

अँखिया उठा के जब ओह पाटी ताकीला त, लउकेला पाकवा के घर,

ओही रे महलिया में राजा बाबू राजकरसु, करेलन सगरे कहर।

भोरवा में चाभेलन खोउआ-मलइया हो, दूधवा से रोज लागे भोग,

चेरिया-लंउड़ियन के कमी ना महलिया में, देखीं सभे ह ई सनजोग।

केहू के मिलत नइखे फटही लुगरिया हो, सतुओ भेंटात नइखे रोज,

केहू घरे छने रोज-रोज मलपुअवा हो, रोजे-रोजे होला महाभोज।

दूनो जाना हवन एके देसवा के पूतवा हो, काहे बड़ुए अतना के फेर,

जागऽ जागऽ जागऽ अब देस के पहरुआ हो, खतम करेके बा अन्हेर।

suni ke roaiya majurvan ke putvan ke, phate la karejva hamar,

bhorhin machela kohram roj gharva mein, laDelan sa roje chari baar.

gurva mithaiya ta sapne mein laukela, milela na uhnin ke bhaat,

satua ke libri phajirhin kha chatelan sa, ohi pa katela din raat.

roje roje satuo bhentala nahin bhorva mein, kati jala kabhun upaas,

din bhar aasra mein takelan sa tukur tukur miti jala ratiya mein aas.

dehiya mein bate ego phathi bhagaiya ho, ego baDue phathi kamij,

ohu mein se niklela manhak pasenva ke, bharal baDue ohu mein galij.

ankhiya utha ke jab oh pati takila ta, laukela pakva ke ghar,

ohi re mahaliya mein raja babu rajakarasu, karelan sagre kahar.

bhorva mein chabhelan khoua malaiya ho, dudhva se roj lage bhog,

cheriya lanuDiyan ke kami na mahaliya mein, dekhin sabhe ha ii sanjog.

kehu ke milat naikhe phathi lugariya ho, satuo bhentat naikhe roj,

kehu ghare chhane roj roj malapuava ho, roje roje hola mahabhoj.

duno jana havan eke desva ke putva ho, kahe baDue atna ke pher,

jaagऽ jaagऽ jaagऽ ab des ke paharua ho, khatam kareke ba anher.