हरि सौं प्रेम नेम जो रहिहैं।

तौ कहा जग उपहास प्रीति ते सरै कहा कोऊ कछु कहिहैं॥

हरि निज रूप अनूप अभैवर, सुबस भयौ ऐसौ सुख जहिहैं।

परम पवित्र पतित पावन जस, सो तजि कौन स्वर्ग चढ़िहैं॥

पतिव्रत गयौ तौ रह्यौ नहीं कछु, या बड़ हानि जानि को सहिहैं।

कौन पतित पति कौ व्रत परिहरि, भ्रमि संसार धार में बहिहैं॥

आन उपासन करि पति परिहरि, धृग सोभा ऐसी जो महि हैं।

तजि पारस पाषान बाँधि उर, बसि घर में घर कौं को दहिहैं॥

हरि सुख सिंधु अपार प्रगट जस, सेइ सुमिरि सुनि करि जस लहिहैं।

‘परसराम’ निर्बाह समझि यह, तजि हरि सिंह स्वान को गहिहैं॥