स्मृति-गीत-(2)
smriti geet (2)
(1)
भरल-पुरल छथि प्रकृति आइ,
पुनि भेल शिशिर-अवसान प्रिये!
वर वसन्त अणु-अणुकेँ देलन्हि,
अभिनव यौवन-दान प्रिये!
छन-छन मादकता विकसित हो,
पल-पल आकुल प्राण प्रिये!
झूमि-झूमि गबइत अछि कोइलि,
सुख सँ पञ्चम-तान प्रिये!
लक्षित होइछ कली-कली मे
अहँक मधुर मुसकान प्रिये!
विरह-व्यथा-घट मे अँटकल अछि,
तइओ पापी-प्राण प्रिये!
(2)
अछि प्रफुलित रसाल मलयानिल,
पाबि सुरभि-सम्भार प्रिये!
दिनकर परम प्रखरता, रजनी
तारक-मौक्तिक-हार प्रिये!
मधुप पराग, राग, मद-मातल,
प्रस्तुत मधु-भण्डार प्रिये!
गन्धहीन किंशुको देखाबथि,
छवि जनबथि उद्गार प्रिये!
संस्मृतिमय संसार हमर हो
अन्धकार बड़ भान प्रिये!
विरह-व्यथा-घट मे अँटकल अछि,
तइओ पापी-प्राण प्रिये!
(3)
आइ 'भुवन' मे, जीवन मे हो
परिवर्तन आभास प्रिये!
जन-जन केँ नव आश अओर,
वसुधामे अछि उल्लास प्रिये!
सब पुलकित, सब अमल-धवल,
सबहिक मुखपर मृदु-हास प्रिये!
प्रेम-देव छथि पुनः बिछओने,
थल-थल प्रेमक फाँस प्रिये!
अश्रु-गरल हम पीबि बिताबी,
जीवन मृतक-समान प्रिये!
विरह-व्यथा-घट मे अँटकल अछि,
तइओ पापी-प्राण प्रिये!
- पुस्तक : भुवनेश्वर सिंह ‘भुवन’ रचना-संचयन (पृष्ठ 93)
- संपादक : अजीत मिश्र
- रचनाकार : भुवनेश्वर सिंह ‘भुवन’
- प्रकाशन : साहित्य अकादेमी, नई दिल्ली
- संस्करण : 2024
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
