नगरमे घोल भेलै, काल्हि ओ बयान देतै
कहैछ लोक सब, बताह छै, चलान हेतै
कतेक छोट देहमे कतेक आँखि भेलै
कहैछ गाछ तरक लोककेँ मकान देतै
कतेक हाथ ओकर हाथ लेल उठइत छै
नगर के बौक सभक हाथमे कृपाण देतै
बिहाड़ि संगमे चलैत छै ओकर सदिखन
देबाल तोड़ि देबा लेल ओ परान देतै
जकर चरण अकाशमे उड़ैत छै सदिखन
उड़ैक भेद सभक खोलिकेँ प्रमाण देतै
डुबल छलै अन्हारमे जते, जते सहमल
सभक अकाश हेतै सऽब लेल चान हेतै
स्रोत :
- पुस्तक : अवान्तर (पृष्ठ 9)
- रचनाकार : मायानन्द मिश्र
- प्रकाशन : मैथिली चेतना परिषद्, सहरसा
- संस्करण : 1977
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
