आइ पुनि गोकुल-गलीमे किए हमरा बजा रहलहुँ?

शरद चंद्रक यामिनीमे किए व्रज वन सजा रहलहुँ?

किए यमुना-पुलिन पुलकित कय रहल छी नयन नलिने?

किए मधुमय समय पुनिमक पर्व पुजबी मलय पवने?

सजनि! राधा विरह-बाधा दूर करबा लय न आयब

आइ वृन्दा-कुञ्जमे किन्नहु न हम रस रास गायब

हस्तिनापुर-इन्द्रप्रस्थक दृश्य दुर्गत द्यूत कैतव

सुनि रहल छी जखन शकुनिक दाओ-पेंचक निघिन करतब

एकबसना द्रौपदीकेर लाज अञ्चल जखन लुंठित

गेल गलि-पचि पंचजन युगपुरुष पौरुष परुष कुंठित

टेर कृष्णा केर कृष्णक कान धरि द्रुतगति सुनयबे

असह केशक कथा केशवके खनहु बिसरय न देबे

द्वारका प्रासादसँ रणछोड़के अरि-रंग-मंचे

रण-निमन्त्रण देब, छूटत छनहि जत गृह-रस प्रपंचे

पार्थसारथि हाथमे रथ-रासि देब थम्हाये जा कय

पांचजन्यक घोषमे गीताक अमृतऽध्वनि सुना कय

व्यास व्यस्त सरस्वती-तट महाभारत विरचना हित

तुरित गणपतिके जुमायब चेतना दय लेखना हित

पार्थसारथि रचथु भारत महातथ्य सुझा रहल अछि

मधुर-माहुर भागवत रस-रास एखन बुझा रहल अछि