बहि गइ पूरब कइ बयरिया डगर महकी,
फूलइ लागीं फुलवरिया डगर महकी।
महके खेत महकिगे झुरमुट, महके ताल तलइया,
फुलगेनवा कइ महक उड़ावत झूमि चली पुरवइया।
झूमइ लागीं अरहरिया डगर महकी,
बहि गइ पूरब कइ बयरिया डगर महकी।
पनघट के जमघट मा चरचा छिड़िगै बालेपन कइ,
छम छम छम पायल बाजइ औ चुरिया खन खन खनकइ।
छलकइ गोरी कइ गगरिया डगर महकी,
बहि गइ पूरब कइ बयरिया डगर महकी।
लौटि चले पसु अउर पखेरू अपने अपने थाने,
गइका का थन ताकि ताकि बछरू मन मा ललचाने।
बोली दुधवा केरी धरिया डगर महकी,
बहि गइ पूरब कइ बयरिया डगर महकी।
आइ बसंत सजे अमऊ बउरन कइ मउर लगाए,
गौने कइ दुलहिन अस लाजन मारी सीस नवाए।
नाचइ लागीं बँसवरिया डगर महकी,
बहि गइ पूरब कइ बयरिया डगर महकी।
जला अलाव बइठि तापैं सितलू साजा सुखरानी,
गुड़ गुड़ गुड़ हुक्का बोला फिर चरचा छिड़ी पुरानी।
लागइ लागीं सरबरिया डगर महकी,
बहि गइ पूरब कइ बयरिया डगर महकी।
- पुस्तक : माटी औ महतारी (पृष्ठ 59)
- रचनाकार : आद्या प्रसाद 'उन्मत्त'
- प्रकाशन : अवधी अकादमी
संबंधित विषय
हिंदी क्षेत्र की भाषाओं-बोलियों का व्यापक शब्दकोश : हिन्दवी डिक्शनरी
‘हिन्दवी डिक्शनरी’ हिंदी और हिंदी क्षेत्र की भाषाओं-बोलियों के शब्दों का व्यापक संग्रह है। इसमें अंगिका, अवधी, कन्नौजी, कुमाउँनी, गढ़वाली, बघेली, बज्जिका, बुंदेली, ब्रज, भोजपुरी, मगही, मैथिली और मालवी शामिल हैं। इस शब्दकोश में शब्दों के विस्तृत अर्थ, पर्यायवाची, विलोम, कहावतें और मुहावरे उपलब्ध हैं।
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
