अपन कहल यैह माटि अइ, जायब कतऽ ई छोड़िकऽ
पुरखा सभसँ भेटल अइ जे, स्नेह-ज्ञानमे बोड़िकऽ
अही माटिमे लड़ैत-पड़ैत हम सिखलौँ देबऽ गुड़कुनियाँ
एकरे ममता-गुण-गौरवसँ लगए सुहाओन सगर दुनियाँ
नस-नसमे दौगैत परिचयसँ रहब कोना मुह मोड़िकऽ
अपन कहल यैह माटि अइ, जायब कतऽ ई छोड़िकऽ
अपने हाथेँ सिरजैत पूजी हम कर्मक भगवानकेँ
संसारहिकेँ हीत बुझी हम छोड़िकऽ बस बइमानकेँ
तन-मन-जीवन उर्वर बनबी सभटा परती तोड़िकऽ
अपन कहल यैह माटि अइ, जायब कतऽ ई छोड़िकऽ
अपनाबीचक औल-झौलकेँ अपनेसँ फरिएबै हम
स्नेहक सिञ्चनसँ ई धरती युगयुगतक हरिएबै हम
खगन भेलापर देबै देहसँ सभटा खून निचोड़िकऽ
अपन कहल यैह माटि अइ, जाएब कतऽ ई छोड़िकऽ
- पुस्तक : ई-मिथिला
- संपादक : बालमुकुन्द
- रचनाकार : धीरेन्द्र प्रेमर्षि
- संस्करण : 2025
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
